葵青劇院，塊地原本係葵涌對出嘅垃圾灣，卽係海來嘅，有水上人聚居。二十世紀六十年代，垃圾灣填海，是爲葵涌新區。而葵青劇院笪地，連同家下新都會廣場、葵涌廣場兩笪地，曾經係葵泰臨時房屋區所在地。葵泰拆咗之後，先後落成葵涌廣場、新都會廣場，而葵青劇院笪地，就一直丟空。 喺新界人口眾多嘅行政區之中，都有大會堂、民娛中心等，唯獨葵青區無文藝表演場地。最尾區域市政局決定起葵青劇院。劇院於一九九六年動工，耗資約莫四億七千萬港元。到咗一九九九年十一月十八號，由臨時區域市政局主席劉皇發主持開幕。 後尾香港政府廢區域市政局，場地就交畀政府部門，康樂及文化事務署管。